ஆந்திரப் பிரதேசத்தின் புகழ்பெற்ற சுற்றுலாத் தலமான கண்டிகோட்டாவில் குற்றச் செயல்களைத் தடுக்கவும், சுற்றுலாப் பயணிகளின் பாதுகாப்பை உறுதி செய்யவும் கடப்பா மாவட்ட காவல்துறை கண்காணிப்பை தீவிரப்படுத்தியுள்ளது. இந்தியாவின் 'கிராண்ட் கேன்யன்' என்று அழைக்கப்படும் இந்த இடத்திற்கு அண்டை மாநிலங்களான கர்நாடகா, தெலுங்கானா மற்றும் தமிழ்நாட்டிலிருந்தும் ஏராளமான சுற்றுலாப் பயணிகள் வந்து செல்கின்றனர். ஆனால், சமீபகாலமாக இங்கு பொது இடங்களில் மது அருந்துவது மற்றும் ஒழுங்கீனமான கும்பல்களின் நடமாட்டம் அதிகரித்துள்ளதால், போலீஸார் ட்ரோன் கேமராக்கள் மூலம் கண்காணிக்கத் தொடங்கியுள்ளனர்.

கடப்பா எஸ்பி நச்சிகேத் விஸ்வநாத் ஷெல்கே கூறுகையில், பரந்து விரிந்த பாறைப் பகுதிகளில் போலீஸார் நேரடியாகச் சென்று கண்காணிப்பது கடினம் என்பதால், குற்றவாளிகளை துல்லியமாக அடையாளம் காண ட்ரோன் கண்காணிப்பு முறை கையில் எடுக்கப்பட்டுள்ளது என்றார். மேலும், அருகில் உள்ள நகரங்களைச் சேர்ந்த கல்லூரி மாணவர்கள் வகுப்புகளைப் புறக்கணித்துவிட்டு இங்கு வருவதைத் தடுக்கவும் இந்த நடவடிக்கை உதவும். கடந்த ஆண்டு இங்கு கல்லூரி மாணவர் ஒருவர் மர்மமான முறையில் இறந்து கிடந்தது குறிப்பிடத்தக்கது.