ஜூலை 31 வருமான வரி தாக்கல் செய்வதற்கான கடைசி தேதி நெருங்கிவிட்ட நிலையில், காலக்கெடு நீட்டிக்கப்படுமா என்ற கேள்வி வரி செலுத்துவோர் மத்தியில் எழுந்துள்ளது. ஒவ்வொரு ஆண்டும் காலக்கெடு நெருங்கும் போது சமூக ஊடகங்களில் இத்தகைய வதந்திகள் பரவுவது வழக்கம் தான் என்றாலும், அதிகாரப்பூர்வ அறிவிப்பு வரும் வரை தற்போதைய காலக்கெடுவை மனதில் கொண்டு செயல்பட வேண்டும் என்று நிபுணர்கள் கூறுகின்றனர்.

பேங்க் பஜார் சிஇஓ அடில் ஷெட்டி கூறுகையில், காலக்கெடு நீட்டிப்பை எதிர்பார்த்து வரி செலுத்துவோர் காத்திருக்க வேண்டாம் என்று அறிவுறுத்தியுள்ளார். காலக்கெடுவை தவறவிட்டால், வரி செலுத்துவோரின் வருமானத்தைப் பொறுத்து ரூ. 5,000 வரை தாமதக் கட்டணம் விதிக்கப்படலாம். மேலும், செலுத்தப்படாத வரிக்கு வட்டி விதிக்கப்படலாம் மற்றும் ரீஃபண்ட் பெறுவதிலும் தாமதம் ஏற்படலாம்.

ஆரம்பத்தில் போர்ட்டலில் சில தொழில்நுட்பக் கோளாறுகள் மற்றும் படிவம் 26AS போன்றவற்றை ஒப்பிடுவதில் சிரமம் இருந்தபோதிலும், தற்போது வருமான வரித்துறை தனது இணையதளத்தை மேம்படுத்தியுள்ளது. எனவே, சிபிடிடி (CBDT) தரப்பில் இருந்து அதிகாரப்பூர்வ அறிவிப்பு வரும் வரை, ஜூலை 31-க்குள் ஐடிஆர் தாக்கல் செய்வதே பாதுகாப்பானது.