பிரபல நிதி ஆலோசகர் மற்றும் 'ரிச் டேட் புவர் டேட்' நூலின் ஆசிரியர் ராபர்ட் கியோசாகி, வெள்ளியின் எதிர்கால விலை குறித்து ஒரு முக்கிய கணிப்பை வெளியிட்டுள்ளார். வெள்ளியின் விலை ஒரு அவுன்ஸ் 200 டாலரைத் தொடலாம் என்று அவர் தனது சமூக வலைதளப் பதிவில் தெரிவித்துள்ளார். ஒரு அவுன்ஸ் வெள்ளி 3 டாலருக்கும் குறைவாக இருந்தபோதே தான் இதை வாங்கத் தொடங்கியதாகவும், தற்போது விலை உயர்ந்த நிலையிலும் தொடர்ந்து வாங்கி வருவதாகவும் அவர் குறிப்பிட்டுள்ளார்.

வெள்ளியின் தேவை மற்றும் விநியோகத்திற்கு இடையே உள்ள இடைவெளியை கியோசாகி சுட்டிக்காட்டுகிறார். உலகின் மக்கள் தொகையில் சுமார் 40 சதவீதத்தை உள்ளடக்கிய மூன்று அரசாங்கங்கள் பாதுகாப்பிற்காக அதிக அளவில் வெள்ளியைச் சேமித்து வைப்பதாக அவர் கூறுகிறார். மேலும், ஸ்மார்ட்போன்கள், சோலார் பேனல்கள் மற்றும் பாதுகாப்புத் துறை சாதனங்களில் வெள்ளியின் பயன்பாடு அதிகரிப்பதால், அதன் விநியோகம் குறைந்து விலை உயருவதற்கான வாய்ப்புகள் அதிகம் உள்ளது.