உத்தரப் பிரதேசத்தின் பலியா மாவட்ட அரசுப் பள்ளியில் பணிபுரியும் 50 வயது ஆசிரியர் ஒருவர், 6-ம் வகுப்பு மாணவியுடன் ஆபாசமாக நடந்துகொண்டதாகக் கூறப்படும் புகாரின் பேரில் சஸ்பெண்ட் செய்யப்பட்டுள்ளார். மாணவியின் கண்ணியம் மற்றும் பாதுகாப்பைக் கருத்தில் கொண்டு இந்த நடவடிக்கை எடுக்கப்பட்டுள்ளதாக மாவட்ட அடிப்படை கல்வி அதிகாரி மனிஷ் குமார் சிங் தெரிவித்தார்.

ஆசிரியர் மாணவியைத் தனியாக அழைத்துச் சென்று பள்ளியின் ஸ்மார்ட் வகுப்பறையில் ஆபாசமாக நடந்துகொண்டதாகவும், அவர் எதிர்ப்பு தெரிவித்தால் பள்ளியில் இருந்து பெயரை நீக்கிவிடுவேன் என்று மிரட்டியதாகவும் முதற்கட்ட விசாரணையில் தெரியவந்துள்ளது. இதனால் ஆத்திரமடைந்த பெற்றோர் மற்றும் கிராமவாசிகள் பள்ளியின் முன்னால் சாலை மறியலில் ஈடுபட்டனர்.

கல்வித் துறை அதிகாரி சுனில் சௌபேயின் அறிக்கையின் அடிப்படையில், செவ்வாய்க்கிழமை இரவு ஆசிரியர் உடனடியாக சஸ்பெண்ட் செய்யப்பட்டார். இந்த விவகாரம் குறித்து விரிவான விசாரணை நடத்த உத்தரவிடப்பட்டுள்ளதுடன், 15 நாட்களுக்குள் அறிக்கை சமர்ப்பிக்கவும் விசாரணை அதிகாரி நியமிக்கப்பட்டுள்ளார்.