பாகிஸ்தான் ஆக்கிரமிப்பு காஷ்மீரில் (POK) போராட்டங்களை ஒடுக்குவதற்கும், இணையத் தடைகளை விதிப்பதற்கும் சர்வதேச அளவில் கடும் கண்டனங்கள் எழுந்துள்ளன. இந்தச் சூழலில், வெளிநாட்டு ஊடகங்களின் செயல்பாடுகளைக் கட்டுப்படுத்த பாகிஸ்தான் அரசு புதிய வழிகாட்டுதல்களை வெளியிட்டுள்ளது. இதன்படி, வெளிநாட்டுப் பத்திரிகையாளர்கள் செய்தி அறிக்கைகள் அல்லது ஆவணப்படங்களைத் தயாரிக்கத் தகவல் மற்றும் ஒளிபரப்பு அமைச்சகத்திடமிருந்து முறையான தடையில்லாச் சான்றிதழை (NOC) பெற வேண்டும்.

புதிய விதிகளின்படி, வெளிநாட்டுப் பத்திரிகையாளர்கள் இஸ்லாமாபாத், லாகூர் மற்றும் கராச்சி ஆகிய நகரங்களில் மட்டுமே சுதந்திரமாகச் செயல்பட முடியும். மற்ற பகுதிகளில் செய்தி சேகரிக்கவோ அல்லது சமூக ஊடகப் பதிவுகளை வெளியிடவோ அரசின் முன் அனுமதி கட்டாயமாக்கப்பட்டுள்ளது. மேலும், புலனாய்வுப் பத்திரிகையாளர்கள், மொழிபெயர்ப்பாளர்கள் மற்றும் வெளிநாட்டில் வசிக்கும் பாகிஸ்தான் பத்திரிகையாளர்களும் இந்த விதிகளுக்கு உட்பட்டவர்கள்.

அரசின் பாதுகாப்பு அல்லது இறையாண்மைக்கு எதிராகச் செயல்படுவதாகக் கருதினால், பத்திரிகையாளர்களின் அங்கீகாரம் ரத்து செய்யப்படலாம் என்றும் இந்த விதிமுறை கூறுகிறது. அம்னெஸ்டி இன்டர்நேஷனல் போன்ற அமைப்புகள் பாகிஸ்தானின் இந்த நடவடிக்கையைக் கடுமையாக விமர்சித்துள்ளன.