இந்தியாவில் விரைவில் டூ-வீலர் ஆம்புலன்ஸ் சேவை தொடங்கப்பட உள்ளது. சாலை விபத்து அல்லது மருத்துவ அவசர காலங்களில் பெரிய ஆம்புலன்ஸ்கள் சரியான நேரத்தில் செல்ல முடியாத இடங்களுக்கு, இந்த பைக் ஆம்புலன்ஸ் மிக விரைவாக நோயாளிகளைச் சென்றடையும். குறிப்பாக மலைப்பகுதிகள், கிராமப்புறங்கள் மற்றும் மோசமான சாலைப் பாதைகளில் இந்த ஏற்பாடு உயிர்களைக் காக்க முக்கியப் பங்கு வகிக்கும்.

சாலைப் போக்குவரத்து மற்றும் நெடுஞ்சாலை அமைச்சகம் (MoRTH), மத்திய மோட்டார் வாகன விதிகளில் மாற்றத்திற்குக் கோரிக்கை விடுத்துள்ளது. இதன் மூலம் டூ-வீலர் ஆம்புலன்ஸ்கள் ஒரு தனி வாகனப் பிரிவாக அங்கீகரிக்கப்படும். இதுவரை இந்தியாவில் பைக் ஆம்புலன்ஸிற்கான முறையான உற்பத்தி மற்றும் பாதுகாப்புத் தரநிலைகள் இல்லை, இந்த புதிய முன்மொழிவு அந்தப் பிரச்சனையைத் தீர்க்கும்.

அக்டோபர் 1, 2027 முதல் தயாரிக்கப்படும் L2 வகை டூ-வீலர் ஆம்புலன்ஸ்கள் AIS-209 தரநிலைகளைப் பின்பற்ற வேண்டும் என்று அரசு கூறுகிறது. இதில் நோயாளி பாதுகாப்பாகச் செல்ல பிரத்யேக கேரியர் சிஸ்டம் மற்றும் அவசர கால எச்சரிக்கை விளக்குகள் இருக்கும். மாநில அரசுகள் அனுமதிக்கும் பகுதிகளில் மட்டுமே இவை இயங்க அனுமதிக்கப்படும் மற்றும் இரண்டு ஆண்டுகளுக்கு ஒருமுறை ஃபிட்னஸ் சான்றிதழ் பெற வேண்டும்.