சர்வதேச எல்லைக்கு 1 கிமீ தொலைவிற்குள் எந்தவொரு சூரிய அல்லது காற்றாலை திட்டத்தையும் அமைக்க உள்துறை அமைச்சகம் தடை விதித்துள்ளது. மேலும், சீனா, பாகிஸ்தான் மற்றும் வங்கதேசத்தைச் சேர்ந்த பணியாளர்களைப் பயன்படுத்துவதற்கும் கடுமையான கட்டுப்பாடுகள் விதிக்கப்பட்டுள்ளன.
சர்வதேச எல்லைக்கு 1 கிமீ தொலைவிற்குள் எந்தவொரு சூரிய, காற்று அல்லது கலப்பு புதுப்பிக்கத்தக்க எரிசக்தி திட்டங்களும் அமைக்கப்படக் கூடாது என்று உள்துறை அமைச்சகம் (MHA) புதிய தேசிய பாதுகாப்பு வழிகாட்டுதல்களை வெளியிட்டுள்ளது. எல்லையிலிருந்து 50 கிமீ தொலைவிற்குள் அமைந்துள்ள திட்டங்களுக்கு உள்துறை அமைச்சகத்தின் பாதுகாப்பு அனுமதி பெறுவது கட்டாயமாக்கப்பட்டுள்ளது.
இந்த புதிய வழிகாட்டுதல்களின்படி, மத்திய அரசின் முன் அனுமதி மற்றும் உள்துறை அமைச்சகத்தின் பாதுகாப்பு அனுமதி இன்றி திட்ட மேம்பாட்டாளர்கள் நிலத்தை வெளிநாட்டு நிறுவனங்களுக்கு மாற்ற முடியாது. மேலும், சீனா, பாகிஸ்தான் மற்றும் வங்கதேசத்தைச் சேர்ந்த பொறியாளர்கள் அல்லது ஊழியர்களைப் பணியமர்த்த உள்துறை அமைச்சகத்தின் முறையான அனுமதி அவசியம்.
பாதுகாப்பு காரணங்களுக்காக, திட்டப் பகுதிகளில் ஆண்டி-ட்ரோன் அமைப்புகள் உள்ளிட்ட உள்கட்டமைப்புகளை நிறுவுவது கட்டாயமாக்கப்பட்டுள்ளது. மேலும், எல்லைப் பகுதிகளில் கட்டிடங்களின் உயரம் மற்றும் தங்குமிடங்கள் அமைப்பதற்கும் குறிப்பிட்ட கட்டுப்பாடுகள் விதிக்கப்பட்டுள்ளன.
