புதன்கிழமை நடைபெற்ற மத்திய அமைச்சரவைக் கூட்டத்தில், பிரதமர் நரேந்திர மோடி தனது அமைச்சரவை உறுப்பினர்களை சமூக ஊடகங்களில், குறிப்பாக இன்ஸ்டாகிராமில் தீவிரமாக செயல்படுமாறு அறிவுறுத்தியுள்ளார். அமைச்சர்களுள் எத்தனை பேர் இன்ஸ்டாகிராம் போன்ற தளங்களை உண்மையாகப் பயன்படுத்துகிறார்கள் என்று அவர் கூட்டத்தில் கேட்டதாகத் தகவல்கள் தெரிவிக்கின்றன. இந்தத் தளத்தில் இளைஞர்கள் பெருமளவில் இணைந்துள்ளதால், அவர்களுடன் அரசு நேரடியாகத் தொடர்பு கொள்ள வேண்டியதன் அவசியத்தை அவர் வலியுறுத்தினார்.

அரசாங்கத்தின் சாதனைகள் மற்றும் திட்டங்கள் குறித்த பதிவுகளைப் பகிர்வது மட்டும் போதாது என்றும், சமூக ஊடகங்கள் மூலம் இளைஞர்களுடன் ஊடாடும் வகையில் (interactive) இணைய வேண்டும் என்றும் பிரதமர் கூறினார். இளைஞர்களிடம் அரசின் திட்டங்கள் மற்றும் முன்னெடுப்புகளைத் திறம்பட கொண்டு சேர்க்க, அமைச்சர்கள் வழக்கமான ரீல்ஸ் மற்றும் பிற டிஜிட்டல் உள்ளடக்கங்களைப் பகிர வேண்டும் என்று அவர் பரிந்துரைத்தார்.