இளைஞர்களின் போராட்டங்களால் அதிர்ச்சியடைந்த அரசியல் தலைவர்கள், தற்போது அவர்களின் தேவைகளை பூர்த்தி செய்ய முன்வந்துள்ளனர். குறிப்பாக அடுத்த ஆண்டு தேர்தல் வரவிருக்கும் உத்தரபிரதேசம், உத்தரகண்ட் மற்றும் கோவா மாநிலங்களில் இளைஞர்களுக்கான சிறப்பு திட்டங்கள் அறிவிக்கப்பட்டுள்ளன. உத்தரபிரதேச முதல்வர் யோகி ஆதித்யநாத், 16 முதல் 35 வயதுடைய இளைஞர்களின் திறன் மேம்பாட்டிற்காக புதிய கொள்கையை அறிமுகப்படுத்தியுள்ளார்.

உத்தரகண்ட் முதல்வர் புஷ்கர் சிங் தாமி, அரசுப் பள்ளி மாணவர்களுக்கு போட்டித் தேர்வுகளுக்கான இலவச ஆன்லைன் பயிற்சியை வழங்க 7 கோடி ரூபாய் ஒதுக்கியுள்ளார். கோவா முதல்வர் பிரமோத் சாவந்த் 2,000-க்கும் மேற்பட்ட வேலைவாய்ப்புகளை வழங்கப்போவதாக தெரிவித்துள்ளார். அஸாம், குஜராத் மற்றும் பீகார் மாநிலங்களிலும் கல்விக்கடன் உயர்வு மற்றும் தேர்வு சீர்திருத்தங்கள் போன்ற நடவடிக்கைகள் எடுக்கப்பட்டுள்ளன.