கனடாவில் வழக்கமான கர்ப்பகால பரிசோதனையின் போது ஒரு நெகிழ்ச்சியான சம்பவம் நடந்துள்ளது. கருவில் இருக்கும் குழந்தை தன் தந்தையின் குரலைக் கேட்டு புன்னகைத்ததைக் கண்டு, தாய் லியா ஒலிவேரா ஆனந்தக் கண்ணீர் வடித்தார்.
கனடாவைச் சேர்ந்த லியா ஒலிவேரா தனது வழக்கமான கர்ப்பகால அல்ட்ராசவுண்ட் பரிசோதனைக்காக மருத்துவமனைக்குச் சென்றிருந்தார். அப்போது அவரது கணவர் ஆண்ட்ரூ ஒலிவேரா, மனைவியின் வயிற்றை மெதுவாக முத்தமிட்டு, பிறக்காத தன் மகளிடம், "குட் மார்னிங், ஹேப்பி சாட்டர்டே. உனக்கு பசிக்கிறதா?" என்று அன்போடு பேசினார். அவர் பேசி முடித்த சில நொடிகளிலேயே, அல்ட்ராசவுண்ட் திரையில் அந்த அதிசய நிகழ்வு நிகழ்ந்தது.
கருவில் இருந்த குழந்தை தன் தந்தையின் குரலைக் கேட்டு அழகாகப் புன்னகைப்பது போன்ற முகபாவனையை வெளிப்படுத்தியது. இதைக் கண்டு அறையில் இருந்த மருத்துவப் பணியாளர்களும் குடும்பத்தினரும் மகிழ்ச்சியில் துள்ளிக் குதித்தனர். லியாவின் சகோதரி இந்த நெகிழ்ச்சியான தருணத்தை தனது கேமராவில் பதிவு செய்ய, தற்போது இந்த வீடியோ சமூக வலைதளங்களில் தீயாய் பரவி வருகிறது. தனது மகளின் இந்த எதிர்வினையைக் கண்டு லியா ஆனந்தக் கண்ணீர் வடித்தார்.
நிபுணர்களின் கூற்றுப்படி, கருவில் இருக்கும் குழந்தைகள் 18 முதல் 25 வாரங்களுக்குள் சத்தங்களைக் கேட்கத் தொடங்குகின்றன. மேலும் 25 முதல் 28 வாரங்களில் அவை தாயின் குரல் மற்றும் வெளிப்புற சத்தங்களுக்கு எதிர்வினை ஆற்றுகின்றன. அல்ட்ராசவுண்டின் போது குழந்தைகள் புன்னகைப்பது அல்லது கொட்டாவி விடுவது போன்ற பாவனைகள் பொதுவானவை என்றாலும், இது பெற்றோருக்கும் குழந்தைக்குமான உணர்வுப்பூர்வமான பிணைப்பைக் காட்டுகிறது.