ఆదాయపు పన్ను రిటర్నుల (ఐటీఆర్) దాఖలుకు జూలై 31 చివరి తేదీ కావడంతో, గడువు పొడిగింపు ఉంటుందా లేదా అనే చర్చ పన్ను చెల్లింపుదారుల్లో మొదలైంది. ప్రతి సంవత్సరం లాగే ఈసారి కూడా సోషల్ మీడియాలో గడువు పొడిగింపుపై రకరకాల ప్రచారాలు జరుగుతున్నాయి. అయితే, ప్రభుత్వం నుంచి అధికారిక ప్రకటన వచ్చే వరకు ఈ పుకార్లను నమ్మవద్దని పన్ను నిపుణులు హెచ్చరిస్తున్నారు.

బ్యాంక్‌బజార్ సీఈఓ అధిల్ శెట్టి మాట్లాడుతూ, గడువు పొడిగింపుపై ఆశలతో వేచి చూడటం మంచిది కాదని పేర్కొన్నారు. గడువు దాటితే పన్ను చెల్లింపుదారుల ఆదాయాన్ని బట్టి రూ. 5,000 వరకు ఆలస్య రుసుము చెల్లించాల్సి ఉంటుంది. అంతేకాకుండా, చెల్లించని పన్నుపై వడ్డీ పడటంతో పాటు రీఫండ్ ప్రక్రియ కూడా ఆలస్యమయ్యే అవకాశం ఉంది.

ప్రారంభంలో పోర్టల్‌లో కొన్ని సాంకేతిక సమస్యలు ఎదురైనప్పటికీ, ఆదాయపు పన్ను శాఖ ప్రస్తుతం ఈ-ఫైలింగ్ వ్యవస్థను మెరుగుపరిచింది. కాబట్టి సీబీడీటీ (CBDT) నుంచి అధికారిక నోటిఫికేషన్ వచ్చే వరకు, జూలై 31 లోపు ఐటీఆర్ దాఖలు చేయడమే సురక్షితమైన మార్గం.