రాష్ట్రంలో రోజురోజుకూ పెరుగుతున్న విద్యుత్ అవసరాలను తీర్చడంతో పాటు దీర్ఘకాలిక ఇంధన భద్రతను పటిష్టం చేసేందుకు వీలుగా పోటీ బిడ్డింగ్ ద్వారా 1,600 మెగావాట్ల బొగ్గు ఆధారిత థర్మల్ విద్యుత్‌ను కొనుగోలు చేయాలని ఆంధ్రప్రదేశ్ ప్రభుత్వం నిర్ణయించింది. ఈ కొనుగోలుకు ఆంధ్రప్రదేశ్ విద్యుత్ నియంత్రణ మండలి (APERC) సూత్రప్రాయంగా ఆమోదం తెలపడంతో, రాష్ట్ర డిస్కమ్‌లు పోటీ బిడ్డింగ్ ప్రక్రియను ప్రారంభించేందుకు మార్గం సుగమమైంది.

ఈ విద్యుత్ కొనుగోలును విద్యుత్ చట్టం, 2003లోని సెక్షన్ 63 ప్రకారం టారిఫ్ ఆధారిత పోటీ బిడ్డింగ్ ద్వారా, DBFOO (డిజైన్, బిల్డ్, ఫైనాన్స్, ఓన్ అండ్ ఆపరేట్) నమూనాలో చేపట్టనున్నారు. కేంద్ర విద్యుత్ అథారిటీ (CEA) నివేదిక ప్రకారం, రాష్ట్రంలో నమ్మకమైన విద్యుత్ సరఫరాను నిర్ధారించడానికి 2035-36 నాటికి దశలవారీగా దాదాపు 5,588 మెగావాట్ల బొగ్గు ఆధారిత థర్మల్ విద్యుత్ సామర్థ్యాన్ని జోడించాల్సి ఉంటుంది. ఇందులో భాగంగానే మొదటి దశ కింద ఈ 1,600 మెగావాట్ల కొనుగోలు ప్రక్రియను చేపట్టారు. ముఖ్యమంత్రి నారా చంద్రబాబు నాయుడు అధ్యక్షతన జరిగిన సమీక్షా సమావేశం అనంతరం ఈ నిర్ణయం తీసుకున్నారు.