తూర్పు కనుమల సుందరమైన ప్రకృతి ఒడిలో విశాఖపట్నం నగరం కనిపించేలా 'అట్మాస్పియర్ హిల్లోరా ఎకో రిసార్ట్ విశాఖపట్నం' పేరుతో ఫైవ్ స్టార్ లగ్జరీ ఎకో-రిసార్ట్‌ను నిర్మించేందుకు ఏవీఎన్‌జీ డెవలపర్స్, అట్మాస్పియర్ కోర్ మధ్య హోటల్ మేనేజ్‌మెంట్ ఒప్పందం కుదిరింది. రాష్ట్ర పర్యాటక విధానం వల్లే ఈ పెట్టుబడి సాధ్యమైందని మంత్రి కొండపల్లి శ్రీనివాస్ తెలిపారు. ఈ రిసార్ట్ ఉన్నత స్థాయి వివాహాలు, కార్పొరేట్ ఈవెంట్లకు ప్రధాన వేదికగా మారుతుందని ఆయన ఆశాభావం వ్యక్తం చేశారు.

ఈ రిసార్ట్ ఎస్. కోట సమీపంలో ప్రకృతి మరియు సరస్సుల మధ్య నిర్మించనున్నారు. ఇది త్వరలో ప్రారంభం కానున్న భోగాపురం అంతర్జాతీయ విమానాశ్రయం నుండి సుమారు గంట ప్రయాణ దూరంలో ఉంటుంది. ఈ ప్రాజెక్ట్ రెండు దశల్లో అందుబాటులోకి రానుంది. మొదటి దశలో 2029 మొదటి త్రైమాసికంలో 100 గదులు, రెండో దశలో మరో 80 గదులు అందుబాటులోకి వస్తాయి. ఈ ప్రాజెక్ట్ ద్వారా స్థానికంగా వందలాది మందికి ఉపాధి లభిస్తుందని స్థానిక ఎమ్మెల్యేలు హర్షం వ్యక్తం చేశారు.