గుజరాత్‌లోని మోర్బీ జిల్లా వీర్‌పర్డా గ్రామంలోని ఒక రైతు పొలంలో ఉన్న బావిలో నీరు వింతగా ప్రవర్తిస్తోంది. చుట్టుపక్కల ఉన్న ఇతర బావుల్లో నీరు నిశ్చలంగా ఉన్నప్పటికీ, ఈ బావిలోని నీరు మాత్రం అప్పుడప్పుడు అలల్లా ఎగసిపడుతోంది. ఈ దృశ్యానికి సంబంధించిన వీడియో సోషల్ మీడియాలో వైరల్ కావడంతో ప్రజలు ఆందోళన చెందుతున్నారు.

ఈ ఘటనను భూకంపం అనుమానిస్తున్న స్థానికులకు భౌగోళిక శాస్త్రవేత్తలు స్పష్టత ఇచ్చారు. భారీ వర్షాల వల్ల భూగర్భ జలాలు పెరిగినప్పుడు, భూమిలోని రాళ్ల మధ్య ఉన్న ఖాళీ ప్రదేశాల నుండి గాలి బయటకు వచ్చే క్రమంలో ఈ నీటి కదలికలు ఏర్పడతాయని వారు వివరించారు. మోర్బీ జిల్లా కలెక్టర్ కూడా ఈ విషయాన్ని పరిశీలించి, ప్రజలు ఎలాంటి పుకార్లను నమ్మవద్దని సూచించారు.