మహారాష్ట్రలోని పూణే సమీపంలో ఉన్న లోహగఢ్ కోట నుండి తన కాబోయే భర్త కేతన్ అగర్వాల్ (26)ను లోయలోకి నెట్టి హత్య చేసిన కేసులో సియా గోయల్ (20), ఆమె ప్రియుడు చేతన్ చౌదరి (22)లను పోలీసులు అరెస్టు చేశారు. నవంబర్‌లో జరగాల్సిన తమ పెళ్లిని ఆపడానికి సియా మొదట కేతన్‌ను ఏదైనా ప్రమాదం ద్వారా గాయపరచాలని భావించింది. అయితే, ఒకవేళ అతడు బతికి బయటపడితే తమ కుట్ర బయటపడుతుందనే భయంతో, అతడిని పూర్తిగా అంతమొందించాలని వారు నిర్ణయించుకున్నారు.

ఈ హత్యను ఒక ప్రమాదంగా చిత్రీకరించడానికి నిందితులు ఇద్దరూ చాలా వారాల పాటు ప్లాన్ చేసినట్లు పోలీసులు తెలిపారు. ఇందుకోసం వారు ఇంటర్నెట్‌లో వెతకడమే కాకుండా, పలు సస్పెన్స్ సినిమాలు కూడా చూశారు. శవం లేదా ఎలాంటి ఆధారాలు దొరకని ప్రాంతం కోసం లోనావాలాలోని టైగర్ పాయింట్, విసాపూర్ కోటలను పరిశీలించి, చివరకు లోహగఢ్ కోటను ఎంచుకుని ఈ ఘాతుకానికి ఒడిగట్టారు.