ఇంగ్లాండ్ వన్డే కప్‌లో భాగంగా హాంప్‌షైర్, ససెక్స్ జట్ల మధ్య జరిగిన మ్యాచ్‌లో టోబీ ఆల్బర్ట్ అనే బ్యాట్స్‌మెన్ సిక్సర్ల వర్షం కురిపించాడు. ఒకే ఓవర్‌లో కాకుండా, రెండు వేర్వేరు ఓవర్లలో తను ఎదుర్కొన్న వరుసగా 6 బంతుల్లో 6 సిక్సర్లు బాది అందరినీ ఆశ్చర్యపరిచాడు. నాంటెస్ ఓస్ట్‌హుయిజెన్ వేసిన ఓవర్‌లో రెండు సిక్సర్లు, ఆ తర్వాత ఓలీ కర్ట్లీ వేసిన తర్వాతి ఓవర్‌లో మరో నాలుగు సిక్సర్లు బాదాడు.

ఈ మ్యాచ్‌లో ఆల్బర్ట్ కేవలం 37 బంతుల్లోనే 5 ఫోర్లు, 8 సిక్సర్ల సాయంతో 86 పరుగులు చేశాడు. దీంతో హాంప్‌షైర్ జట్టు నిర్ణీత ఓవర్లలో 9 వికెట్ల నష్టానికి 383 పరుగుల భారీ స్కోరు సాధించింది. అనంతరం భారీ లక్ష్యంతో బరిలోకి దిగిన ససెక్స్ జట్టులో చార్లీ టియర్ (111) సెంచరీతో పోరాడినప్పటికీ, ఆ జట్టు 51 పరుగుల తేడాతో ఓటమి పాలైంది. ఈ విజయంతో హాంప్‌షైర్ నాకౌట్ దశకు చేరువైంది.