பெங்களூரு மாநகர காவல்துறையின் சிறப்பு நடவடிக்கையின் போது அடையாளம் காணப்பட்ட சந்தேகிக்கப்படும் சட்டவிரோத குடியேறிகள், அடுத்தகட்ட சட்ட நடவடிக்கைகளுக்காக அறிக்கையுடன் வெளிநாட்டினர் பிராந்திய பதிவு அலுவலகத்தின் (FRRO) முன் ஆஜர்படுத்தப்பட்டுள்ளனர். பெங்களூரு மாநகர காவல் ஆணையர் சீமந்த் குமார் சிங் ஞாயிற்றுக்கிழமை கூறுகையில், 105 சட்டவிரோத குடியேறிகள் அடையாளம் காணப்பட்டுள்ளதாகவும், மற்றவர்களின் ஆவணங்கள் சரிபார்க்கப்பட்டு வருவதாகவும் தெரிவித்தார்.

காவல்துறை தரவுகளின்படி, வைட்ஃபீல்ட் பகுதியில் 35 போலீஸ் குழுக்கள் 1,035 பேரை ஆய்வு செய்து 62 சட்டவிரோத குடியேறிகளைக் கண்டறிந்துள்ளனர். அதேபோல், எலக்ட்ரானிக்ஸ் சிட்டி பகுதியில் 23 போலீஸ் குழுக்கள் 1,909 பேரை ஆய்வு செய்து 43 சட்டவிரோத குடியேறிகளைக் கண்டறிந்துள்ளனர். முறையான நடைமுறைகளைப் பின்பற்றியே இந்த நடவடிக்கை எடுக்கப்பட்டதாக காவல்துறை தெரிவித்துள்ளது.