கேரள முன்னாள் முதல்வர் பினராயி விஜயனின் மகள் மீதான பணமோசடி வழக்கு தொடர்பாக அவரது வீட்டில் சோதனை நடத்திவிட்டு திரும்பிய அமலாக்கத்துறை (ED) அதிகாரிகள் மீது தாக்குதல் நடத்தப்பட்டது. இந்த வழக்கில் தொடர்புடைய எஸ்.எஃப்.ஐ (SFI) சாலா பகுதி குழு உறுப்பினர் ஆதர்ஷ் என்பவரை சென்னை விமான நிலையத்தில் போலீஸார் திங்கள்கிழமை கைது செய்தனர்.

சம்பவத்தின் வீடியோ காட்சிகளை ஆய்வு செய்தபோது இந்த தாக்குதலில் ஆதர்ஷுக்கு தொடர்பு இருப்பது தெரியவந்தது. ஆனால், அதற்குள் அவர் துபாய்க்கு தப்பிச் சென்றதால், போலீஸார் அவருக்கு எதிராக லுக்அவுட் நோட்டீஸ் பிறப்பித்தனர். இந்நிலையில், திங்கள்கிழமை துபாயில் இருந்து சென்னை வந்திறங்கிய ஆதர்ஷை அதிகாரிகள் தடுத்து நிறுத்திக் காவலில் எடுத்தனர். திருவனந்தபுரம் மியூசியம் காவல் நிலைய போலீஸார் அவரைத் தங்களது காவலில் எடுக்க சென்னை விரைந்துள்ளனர்.

கடந்த மே 27 அன்று திருவனந்தபுரத்தில் உள்ள பினராயி விஜயனின் வாடகை வீட்டில் அமலாக்கத்துறை சோதனை நடத்தியது. சோதனை முடிந்து அதிகாரிகள் திரும்பியபோது, சிபிஐ(எம்), டிஒய்எஃப்ஐ மற்றும் எஸ்எஃப்ஐ அமைப்பைச் சேர்ந்த சுமார் 300 பேர் கொண்ட கும்பல் அவர்கள் மீது தாக்குதல் நடத்தியதாகக் கூறப்படுகிறது. இதில் சிஆர்பிஎஃப் அதிகாரி மற்றும் ஓட்டுநர் ஒருவர் காயமடைந்தது குறிப்பிடத்தக்கது.