நோய்டாவில் 24 வயது பெண் 16-வது மாடியிலிருந்து விழுந்து உயிரிழந்தார். வரதட்சணை கொடுமை காரணமாகவே இந்த சம்பவம் நடந்ததாக அவரது குடும்பத்தினர் குற்றம் சாட்டியுள்ளனர்.
நோய்டாவின் செக்டார்-108-ல் உள்ள டிவைன் மீடோஸ் குடியிருப்பில், 24 வயதான காமினி குமாரி 16-வது மாடியிலிருந்து விழுந்து உயிரிழந்தார். கடந்த ஜூலை 11-ம் தேதி அவருக்கு திருமணம் நடைபெற்றது. ஞாயிற்றுக்கிழமை மாலை காமினி குடியிருப்பு கோபுரத்திலிருந்து குதித்ததாக போலீஸார் தெரிவித்துள்ளனர்.
காமினியின் குடும்பத்தினர், வரதட்சணை கேட்டு கணவர் அவரை துன்புறுத்தியதாகக் கூறி புகார் அளித்துள்ளனர். ஆனால், காமினி மன அழுத்தத்தால் பாதிக்கப்பட்டிருந்ததாகவும், சிகிச்சை பெற்று வந்ததாகவும் அவரது கணவர் மந்தன் திமான் கூறியுள்ளார். தற்கொலை கடிதம் எதுவும் கிடைக்காத நிலையில், போஸ்ட்மார்டம் அறிக்கையை எதிர்பார்த்து போலீசார் விசாரணை நடத்தி வருகின்றனர்.
