1990 ஆம் ஆண்டிலிருந்து பெரும்பாலான நாடுகளில் நோய் இடைவெளி (Morbidity gap) அதிகரித்து வருவதாக லான்செட் பப்ளிக் ஹெல்த் ஆய்வில் தெரிவிக்கப்பட்டுள்ளது. அதாவது, ஒட்டுமொத்த ஆயுட்காலத்திற்கும் ஆரோக்கியமான ஆயுட்காலத்திற்கும் இடையிலான வித்தியாசம் அதிகரித்துள்ளது. 1990 இல் இது 8.8 ஆண்டுகளாக இருந்தது, ஆனால் 2023 இல் 10.7 ஆண்டுகளாக உயர்ந்துள்ளது. மக்கள் நீண்ட காலம் வாழ்கிறார்கள், ஆனால் அதிக ஆண்டுகளை உடல்நலக் குறைபாடுகளுடன் கழிக்கின்றனர்.

இந்தியாவைப் பொறுத்தவரை, இந்த இடைவெளி 1990 இல் 8.4 ஆண்டுகளாக இருந்தது, இது 2023 இல் 10.6 ஆக அதிகரித்துள்ளது. குறிப்பாக, பெண்கள் ஆண்களை விட அதிக காலம் வாழ்கிறார்கள், ஆனால் அவர்கள் அதிக ஆண்டுகளை உடல்நலக் குறைபாடுகளுடன் கழிக்கின்றனர் என்பதை ஆய்வு காட்டுகிறது. உலகளவில் பெண்களின் நோய் இடைவெளி 12.1 ஆண்டுகளாக உள்ளது, ஆண்களுக்கு இது 9.3 ஆண்டுகள்.

தசை மற்றும் எலும்பு தொடர்பான பிரச்சனைகள், குறிப்பாக முதுகு வலி மற்றும் மனநல பாதிப்புகள் இந்த இடைவெளி அதிகரிப்பதற்குக் முக்கிய காரணங்களாக உள்ளன. மேலும், அதிக இரத்த சர்க்கரை மற்றும் உடல் பருமன் (BMI) போன்ற காரணிகளும் ஆரோக்கியத்தைக் குறைக்கின்றன என்று ஆராய்ச்சியாளர்கள் எச்சரிக்கின்றனர்.