భారత యువ బ్యాడ్మింటన్ సంచలనం తన్వి శర్మ తైపీ ఓపెన్ సూపర్ 300 టోర్నమెంట్ మహిళల సింగిల్స్ ఫైనల్లో వియత్నాంకు చెందిన ఆరో సీడ్ థుయ్ లిన్ న్గుయెన్‌ను 21-16, 21-16తో ఓడించి తన తొలి బిడబ్ల్యూఎఫ్ వరల్డ్ టూర్ టైటిల్‌ను సొంతం చేసుకుంది. పి.వి. సింధు మాజీ కోచ్ పార్క్ టే-సాంగ్ పర్యవేక్షణలో శిక్షణ పొందుతున్న తన్వి, 2008లో సైనా నెహ్వాల్ తర్వాత తైపీ ఓపెన్‌లో మహిళల సింగిల్స్ టైటిల్ గెలుచుకున్న మొదటి భారతీయురాలిగా నిలిచింది.

ఈ మ్యాచ్‌లో 17 ఏళ్ల తన్వి శర్మ తన అద్భుతమైన స్మాష్‌లు, డ్రాప్ షాట్లతో ప్రత్యర్థిని ఉక్కిరిబిక్కిరి చేసింది. కేవలం 17 సంవత్సరాల 222 రోజుల వయస్సులోనే ఈ టోర్నమెంట్ చరిత్రలో ఫైనల్‌కు చేరిన అతి పిన్న వయస్కురాలిగా తన్వి సరికొత్త రికార్డు సృష్టించింది. విజయం అనంతరం తన్వి తన బంగారు పతకాన్ని కోచ్ పార్క్ టే-సాంగ్ మెడలో వేసి గురుదక్షిణ సమర్పించుకున్న తీరు క్రీడాభిమానులను ఎంతగానో ఆకట్టుకుంది.