இந்தியாவில் மார்பகப் புற்றுநோய் பாதிப்பு குறித்து மேற்கொள்ளப்பட்ட புதிய ஆய்வில் மிகவும் கவலையளிக்கும் தகவல்கள் வெளியாகியுள்ளன. அதன்படி, நாட்டில் மார்பகப் புற்றுநோயால் பாதிக்கப்படும் பெண்களில், எட்டில் ஒருவருக்கு நோய் முற்றிய நிலையில், அதாவது உடலின் பிற உறுப்புகளுக்கு புற்றுநோய் பரவிய பிறகே அது கண்டறியப்படுகிறது. இதனால் நோயாளிகளைக் குணப்படுத்துவது மிகவும் சவாலானதாக மாறுகிறது.

மார்பகப் புற்றுநோய் குறித்த சமூகத் தயக்கம், வழக்கமான பரிசோதனைகளை மேற்கொள்ளாதது மற்றும் ஆரம்பகால அறிகுறிகளை அலட்சியப்படுத்துவது போன்றவையே இந்த தாமதத்திற்கு முக்கிய காரணங்கள் என்று மருத்துவர்கள் கூறுகின்றனர். கிராமப்புற மற்றும் நகர்ப்புற விளிம்புநிலை மக்களிடையே சுகாதார வசதிகள் எளிதில் கிடைக்காததும் ஒரு முக்கிய காரணியாகும். ஆரம்ப கட்டத்திலேயே கண்டறிந்தால் மார்பகப் புற்றுநோயை முற்றிலும் குணப்படுத்த முடியும் என்பதை அனைவரும் உணர வேண்டும்.