మధ్యప్రదేశ్‌లోని గ్వాలియర్‌లో సైబర్ నేరగాళ్లు ఒక యువకుడిని భారీగా మోసం చేసిన ఘటన వెలుగులోకి వచ్చింది. ఫేస్‌బుక్‌లో షేర్ మార్కెట్ ట్రేడింగ్ ద్వారా 30 శాతం లాభం వస్తుందనే ప్రకటన చూసి యువకుడు ఆకర్షితుడయ్యాడు. మోసగాళ్లు అతడిని వాట్సాప్ గ్రూపులో చేర్చి, ఒక నకిలీ ట్రేడింగ్ యాప్‌లో ఖాతా తెరవమని చెప్పారు.

ఆ యాప్‌లో మొదట 70 లక్షల లాభం, ఆ తర్వాత సుమారు 2.5 కోట్ల రూపాయల బ్యాలెన్స్ ఉన్నట్లు చూపించి అతడిని నమ్మించారు. ఆ డబ్బును విత్ డ్రా చేసుకోవాలని ప్రయత్నించిన ప్రతిసారీ, ఫీజుల పేరుతో మోసగాళ్లు అతడిని మరిన్ని డబ్బులు డిపాజిట్ చేయమని ఒత్తిడి చేశారు. ఈ క్రమంలో రెండు నెలల వ్యవధిలో యువకుడు సుమారు 36 లక్షల రూపాయలను కోల్పోయాడు. చివరకు ఇది మోసమని గ్రహించిన యువకుడు పోలీసులకు ఫిర్యాదు చేశాడు.